హైదరాబాదు నగర శివార్లలో ఉన్న ఔటర్ రింగ్ రోడ్ (ORR) ప్రస్తుత కాలంలో ప్రమాదాలకు అడ్డాగా మారుతోంది. తరచుగా వస్తున్న రోడ్డు ప్రమాదాలు ప్రజల్లో ఆందోళన కలిగిస్తున్నాయి. తాజాగా ఈ (జూలై 18, 2025) తెల్లవారుజామున ఘోర రోడ్డు ప్రమాదం చోటు చేసుకుంది.

ఇబ్రహీంపట్నం మండలం బోంగ్లూర్ సమీపంలో TS07 HW 5858 నంబర్ కలిగిన బెలినో కారు, వేగంగా వెళుతూ లారీని వెనుకవైపు నుంచి ఢీకొట్టింది. ఈ ప్రమాదంలో కారులో ఉన్న నలుగురు అక్కడికక్కడే మృతిచెందారు. మరొకరికి తీవ్రగాయాలయ్యాయి. మృతులు మలోత్ చందులాల్ (29), గగులోత్ జనార్దన్ (50), కావలి బాలరాజు (40)గా గుర్తించారు. ప్రమాద సమయంలో కారులో ఉన్న ఇద్దరి మృతదేహాలు పూర్తిగా ఇరుక్కుపోవడంతో పోలీసులు మూడు గంటలపాటు శ్రమించి వారిని బయటకు తీశారు. మృతదేహాలను ఇబ్రహీంపట్నం మార్చురీకి తరలించారు.

ఇది ఒక్కటే కాదు, గత వారం రోజుల వ్యవధిలో ORRపై రెండు భారీ ప్రమాదాలు చోటుచేసుకున్నాయి. శంషాబాద్ ప్రాంతంలో వేగంగా వచ్చిన బైకు అదుపు తప్పి డివైడర్‌ను ఢీకొట్టి యువకుడు అక్కడికక్కడే ప్రాణాలు కోల్పోయాడు. మరోఘటనలో కొలారులో కంటైనర్ వాహనం ఢీకొనడంతో ఇద్దరు యువకులు మృతిచెందారు.

ఈ ఘటనలతో ORRపై ప్రమాదాల నియంత్రణపై మళ్లీ చర్చ మొదలైంది. హైవేపై వేగాన్ని నియంత్రించేందుకు మరింత చర్యలు తీసుకోవాల్సిన అవసరం స్పష్టమవుతోంది. సిగ్నల్స్, కెమెరాలు, మరియు పెట్రోలింగ్ పెంచితేనే ఈ ప్రమాదాలను తగ్గించవచ్చని నిపుణులు సూచిస్తున్నారు. ప్రజలు కూడా వేగాన్ని నియంత్రించి జాగ్రత్తగా డ్రైవ్ చేయాల్సిన అవసరం ఉంది.