రక్షణ మంత్రి రాజ్‌నాథ్ సింగ్ సంచలన వ్యాఖ్యలు చేశారు .  పాకిస్తాన్ లోని సింధ్ ప్రాంతం గురించి ఆయన చేసిన వ్యాఖ్యలు ప్రస్తుతం హాట్ టాపిక్ గా మారాయి .  ఆయన ఏమన్నారంటే . . "సింధ్ భూభాగం నేడు భారతదేశంలో భాగం కాకపోవచ్చు. కానీ , నాగరికత ప్రకారం అది ఎల్లప్పుడూ భారతదేశంలో భాగంగానే ఉంటుంది. భూమి విషయానికొస్తే, సరిహద్దు ఎప్పుడు మారుతుందో ఎవరికి తెలుసు, రేపు సింధ్ భారతదేశానికి తిరిగి రావచ్చు."

ఢిల్లీలో ఆదివారం  జరిగిన సింధీ సమావేశంలో ప్రసంగిస్తూ రాజ్‌నాథ్ సింగ్ ఈ వ్యాఖ్యలు చేశారు. లాల్ కృష్ణ అద్వానీ గురించి కూడా ఆయన ప్రస్తావించారు, సింధీ హిందువులు, ముఖ్యంగా తన తరానికి చెందినవారు ఇప్పటికీ సింధ్‌ను భారతదేశం నుండి వేరుగా పరిగణించరని ఆయన (అద్వానీ) తన పుస్తకంలో రాశారని రక్షణ మంత్రి అన్నారు. నిజానికి, 1947లో భారతదేశం-పాకిస్తాన్ విభజన తర్వాత సింధ్ ప్రావిన్స్ పాకిస్తాన్‌లో భాగమైంది. ఇది పాకిస్తాన్‌లో మూడవ అతిపెద్ద ప్రావిన్స్, కరాచీ దాని రాజధానిగా ఉంది. ఈ ప్రావిన్స్‌లో ఉర్దూ, సింధీ, ఇంగ్లీష్ మాట్లాడతారు.

సింధ్ ప్రావిన్స్.. 

1947లో భారతదేశం-పాకిస్తాన్ విడిపోయినప్పుడు, వేల సంవత్సరాల పురాతనమైన 200,000 చదరపు కిలోమీటర్ల థార్ ఎడారి కూడా బలి అయింది. ఈ విభజన కేవలం ఎడారి దుమ్ము గురించి మాత్రమే కాదు. ఈ విభజన తర్వాత వచ్చిన వలసలు మొత్తం సింధ్ ప్రాంత  శ్రేయస్సు,  పురోగతిని హింస -పేదరికంగా మార్చాయి.

మధ్యతరగతి హిందువులు సింధ్‌ను విడిచిపెట్టి భారతదేశానికి వలస వెళ్లారు. అదే సమయంలో, భారతదేశం నుండి వచ్చిన ముస్లింలను సింధీ ముస్లింలు తమ వారిగా అంగీకరించలేదు.  పాకిస్తాన్‌లోని సింధీలు భారతీయ ముస్లింలను "ముహాజీర్లు" అని పిలవడం ప్రారంభించారు. ఫలితంగా, సింధీలు, ముహాజీర్ల మధ్య హింస చెలరేగి, దాదాపు 20 సంవత్సరాలు ఈ ప్రాంతం పురోగతికి ఆటంకం కలిగించింది.