ఆంధ్రప్రదేశ్ ప్రభుత్వం బాపట్ల జిల్లాలోని నిజాంపట్నం తీర ప్రాంత భద్రతను పటిష్ఠం చేసేందుకు కీలక చర్యలు చేపట్టింది. రాష్ట్ర ప్రభుత్వం, కేంద్ర కోస్ట్గార్డ్ సంయుక్త భాగస్వామ్యంతో నిజాంపట్నం హార్బర్ విస్తరణతో పాటు, తీర భద్రత కోసం అత్యంత ముఖ్యమైన కొత్త రాడార్ కేంద్రాన్ని ఏర్పాటు చేయబోతున్నారు. ఈ ప్రాజెక్టుల కోసం ప్రభుత్వం మొత్తం రూ.451 కోట్లను కేటాయించింది.
తీరం నుంచి సముద్రంలోకి నిరంతర నిఘా
నిజాంపట్నం హార్బర్ విస్తరణ వల్ల మత్స్యకారులకు మరింత మెరుగైన వసతులు అందుబాటులోకి వస్తాయి. అదేవిధంగా భద్రతా పరంగా ఏర్పాటు చేస్తున్న ఈ రాడార్ కేంద్రం అత్యంత కీలకమైనదిగా అధికారులు భావిస్తున్నారు. ఈ కోస్ట్గార్డ్ రాడార్ సెంటర్ సాయంతో తీరం నుంచి సముద్రంలోకి చాలా దూరం వరకు నిరంతర నిఘా ఉంచడానికి వీలవుతుంది. ఈ ప్రాంతంలో సముద్రంలోకి వెళ్లే ప్రతి పడవ లేదా నౌక కదలికలను ఈ వ్యవస్థ పసిగట్టగలదు. దీనివలన ఈ ప్రాంతంలో మెరుగైన భద్రతా లభిస్తుంది.
అనుమానాస్పద కదలికలపై అప్రమత్తత
రాడార్ వ్యవస్థ ద్వారా సముద్రంలో ఏవైనా అనుమానాస్పద కదలికలు గుర్తించిన వెంటనే, భద్రతా దళాలు అప్రమత్తమై తక్షణమే స్పందించేందుకు అవకాశం లభిస్తుంది. ముఖ్యంగా, ఉగ్రవాద చొరబాట్లు జరగకుండా అడ్డుకోవడంలో ఈ రాడార్ సెంటర్ ప్రధాన పాత్ర పోషిస్తుందని నిఘా వర్గాలు చెబుతున్నాయి. గతంలో సముద్ర మార్గంలో జరిగిన చొరబాట్లు, అక్రమ రవాణా సంఘటనలు భారీ నష్టాన్ని కలిగించిన సంగతి తెలిసిందనే . ఈ నేపథ్యంలో, తీర భద్రతను పటిష్ఠం చేయాల్సిన అవసరం ఎంతైనా ఉందని ప్రభుత్వం గుర్తించింది.
ఈ కొత్త రాడార్ కేంద్రం మత్స్యకారుల భద్రతకు కూడా ఎంతో ఉపయోగపడుతుంది. తుఫానులు, ప్రకృతి విపత్తుల సమయంలో వారిని హెచ్చరించడం, ఏదైనా ప్రమాదం జరిగినప్పుడు త్వరగా గుర్తించడం, సహాయక చర్యలు అందించడం వంటివి సులభమవుతాయి. సముద్రంలో చేపల వేట కోసం వెళ్లే పడవలు అంతర్జాతీయ సరిహద్దులు దాటకుండా కూడా ఈ నిఘా కేంద్రం ద్వారా ట్రాక్ చేయవచ్చు.
అధికారులు తెలిపిన వివరాల ప్రకారం, ఈ ప్రాజెక్టులు త్వరలోనే ప్రారంభమై, నిర్ణీత కాలంలో పూర్తి చేయాలని లక్ష్యంగా పెట్టుకున్నారు. ఈ చర్యలు కేవలం భద్రతను మెరుగుపరచడమే కాకుండా, నిజాంపట్నం హార్బర్ను మరింత అభివృద్ధి చేసి, ఆ ప్రాంత ఆర్థిక కార్యకలాపాలకు కూడా ఊతం ఇస్తాయని ప్రభుత్వం ఆశాభావం వ్యక్తం చేసింది.
.jpg.jpg)
