భారత్ ను దెబ్బ తీశాం.. భారత్ ను వణికించాం అంటూ అంతర్జాతీయ వేదికలపై బీరాలు పోయే మన దాయాది దేశం పాకిస్తాన్ కు చుక్కలు కనిపిస్తున్నాయి. ఒక ప్రాంతంలో వచ్చిన తిరుగుబాటును.. సాయుధ పోరాటాన్ని అణచివేయలేక చేతులెత్తేస్తున్న పరిస్థితి వచ్చింది పాకిస్థాన్ కు. ఇప్పటికే ఆర్థిక సమస్యలు.. అంతర్గత వివాదాలతో తల్లడిల్లుతున్న పాకిస్తాన్ నేతలకు బలూచిస్తాన్ పోరాట యోధులు కంటి మీద కునుకు లేకుండా చేస్తున్నారు. 

పాకిస్థాన్‌లో తిరుగుబాటు ఉద్యమాలు మళ్లీ ముదిరిపోతున్నాయి. ప్రత్యేకంగా బలూచిస్థాన్ ప్రాంతంలో గడచిన కొన్ని నెలలుగా తీవ్ర ఉద్రిక్తతలు నెలకొన్నాయి. ఈ నేపథ్యంలో బలూచ్ లిబరేషన్ ఆర్మీ (BLA) పేరు మళ్లీ ప్రపంచ మీడియా చర్చనీయాంశమైంది. స్వాతంత్ర్యానికి తహతహలాడుతున్న బలూచ్ విప్లవకారులు వరుసగా పాక్ సైన్యంపై దాడులు చేస్తూ దేశ భద్రతను ప్రశ్నార్థకంగా మార్చారు.

తాజా దాడుల్లో 29 మంది సైనికులు మృతి

జూలై 15, 2025 న జరిగిన రెండు వేర్వేరు దాడులు పాకిస్థాన్ సైన్యాన్ని ఉలిక్కిపడేలా చేశాయి.

• కలాత్ జిల్లాలో, సైనికులను తీసుకెళ్తున్న బస్సుపై బీఎల్ఏ గెరిల్లా దాడి నిర్వహించింది. ఈ దాడిలో 27 మంది సైనికులు అక్కడికక్కడే ప్రాణాలు కోల్పోయారు, మరికొంతమంది గాయపడ్డారు.
   
• తరువాత క్వెట్టా నగరంలోని హాజర్‌గంజ్ ప్రాంతంలో ఏర్పాటు చేసిన ఐఈడీ బాంబు పేలుడులో మరో 2 మంది సైనికులు మృతి చెందారు.
   

ఈ దాడుల బాధ్యతను బీఎల్ఏ సోషల్ మీడియాలో తీసుకుంది. చనిపోయిన వారిలో మేజర్ స్థాయి అధికారులు ఉండడం గమనార్హం.

బీఎల్ఏ దాడుల గణాంకాలు — జనవరి నుంచి జూన్ 2025 వరకు

బీఎల్ఏ కేవలం ఒక చిన్న తిరుగుబాటు గ్రూప్ కాదు. ఇది ఒక పక్కా ప్రణాళిక, వ్యూహాలతో ముందుకుసాగుతున్న మిలిటెంట్ సంస్థగా అభివృద్ధి చెందుతోంది.
గత 6 నెలల్లో జరిగిన దాడుల గణాంకాలు ఈ మాటకు నిదర్శనంగా నిలుస్తున్నాయి:

• మొత్తం దాడులు: 286
   
• స్పెషల్ ఆపరేషన్లు: 9
   
• ఆత్మాహుతి దాడులు: 3
   
• పాక్ సైనికుల మృతి: 697
   
• నిర్భంధిత సైనికులు: 290
   
• వాహనాల ధ్వంసం: 133
   
• సైనిక స్థావరాలపై దాడులు: 17
   
• ట్రైన్ హైజాక్ సంఘటనలు
   
• పెద్ద ఎత్తున ఆయుధాల స్వాధీనం
   

ఈ గణాంకాలు చూస్తే, బీఎల్ఏ కార్యకలాపాలు కేవలం తాత్కాలిక తిరుగుబాటు చర్యలు కాకుండా, ఒక స్థిరమైన వ్యూహాత్మక పోరాటంగా రూపుదిద్దుకున్నట్లు స్పష్టంగా అర్థమవుతోంది.

పాక్ భద్రతాపరంగా సంక్షోభంలోకి..

ఈ దాడుల ప్రభావం పాక్ భద్రతాపరంగా తీవ్రంగానే కనిపిస్తోంది. ఆర్మీ మోరాలే కాదు, పౌరులలో భయాందోళనలు పెరిగిపోతున్నాయి. ముఖ్యంగా బలూచిస్థాన్ ప్రాంతంలో పాక్ సైనికులపై ప్రజలలో పెరుగుతున్న వ్యతిరేకత, స్థానికుల మద్దతుతో BLA బలపడుతోందని నిపుణులు చెబుతున్నారు.

అంతర్జాతీయ పరిణామాలు

పాకిస్థాన్‌పై పెరుగుతున్న అంతర్గత ఒత్తిళ్లను చూసి, పలు అంతర్జాతీయ సంస్థలు దీనిపై గమనిస్తున్నారు. మానవ హక్కుల ఉల్లంఘనలు, రాజకీయంగా బలూచ్ ప్రాంతానికి స్వయం ప్రతిపత్తి లేని పరిస్థితి ఇవన్నీ ఈ తిరుగుబాటు ఉద్యమానికి నూరి నూరి పోసాయి.

బలూచిస్థాన్ లిబరేషన్ ఆర్మీ నిర్వహిస్తున్న దాడులు పాకిస్థాన్ భద్రతాపరంగా అతిపెద్ద సవాలుగా మారాయి. ఇది కేవలం లఘు స్థాయి మిలిటెంట్ ఉద్యమం కాదు — ఇది ఒక ప్రణాళికాబద్ధమైన, వ్యూహాత్మక ఉద్యమం. పాకిస్థాన్ ప్రభుత్వానికి, సైన్యానికి ఇప్పుడు భద్రత, ప్రజల విశ్వాసం, అంతర్జాతీయ ఒత్తిళ్లు — అన్నిటినీ ఒకేసారి తట్టుకోాల్సిన పరిస్థితి ఎదురవుతోంది.