కాపు ఉద్యమ నాయకుడు, వైసీపీ సీనియర్‌ నేత ముద్రగడ పద్మనాభం ఆరోగ్యం విషమంగా ఉందని కుటుంబసభ్యులు తెలిపారు. శనివారం తెల్లవారుఝామున ఆయన అనారోగ్యానికి గురికావడంతో వెంటనే కాకినాడలోని ఓ ప్రైవేట్ ఆసుపత్రికి తరలించారు. మెరుగైన వైద్యం అందించేందుకు స్థానికంగా ఉండే మెడికవర్ హాస్పిటల్‌లో ఆయనను జాయిన్ చేశారు. వైద్యులు హుటాహుటిన చికిత్స ప్రారంభించారు. ప్రస్తుతానికి ఆయన ఆరోగ్య పరిస్థితి విషమంగా ఉన్నట్లు వైద్యులు వెల్లడించారు.

ముద్రగడను మెరుగైన చికిత్స కోసం హైదరాబాద్ యశోద ఆసుపత్రికి తరలించాలని కుటుంబ సభ్యులు యోచించారు. అయితే స్థానిక వైద్యుల సూచన మేరకు కాకినాడలోనే అత్యవసర చికిత్స అందించాలనే నిర్ణయానికి వచ్చారు. ముద్రగడ కుటుంబం అప్రమత్తంగా ఉండి, అన్ని వైద్య సహాయాన్ని సమకూర్చుతోంది.

ఇదిలా ఉంటే, ఆసుపత్రిలో ముద్రగడను కుమార్తె బార్లపూడి క్రాంతి పరామర్శించారు. ఆమె డాక్టర్లతో మాట్లాడి ఆరోగ్య పరిస్థితిని తెలుసుకున్నారు. ప్రస్తుతం ఆయన ఆరోగ్యం కొంత స్థిరంగా ఉందని వైద్యులు తెలిపారు. గత కొన్ని రోజులుగా ముద్రగడ పద్మనాభం మరియు ఆయన కుమార్తె క్రాంతి మధ్య వ్యక్తిగత విభేదాలు కొనసాగుతున్న సంగతి తెలిసిందే. అయినప్పటికీ, తండ్రి ఆరోగ్యం విషమంగా ఉండటంతో క్రాంతి ఆసుపత్రికి వచ్చారు.

అయితే ఆసుపత్రి సిబ్బంది క్రాంతిని ముద్రగడ ఉన్న గదికి అనుమతి లేకుండా పంపించడంతో, ముద్రగడ కుమారుడు గిరి ఆగ్రహం వ్యక్తం చేశారు. తాను అనుమతించకుండా ఎవరికైనా ముద్రగడను కలిసేందుకు అవకాశం ఇవ్వకూడదని హాస్పిటల్ సిబ్బందిని గట్టిగా హెచ్చరించారు. ఈ సంఘటన కుటుంబ విభేదాలను మరోసారి వెలుగులోకి తెచ్చింది.

ప్రస్తుతం ముద్రగడ ఆరోగ్యం నిలకడగా ఉన్నప్పటికీ, కుటుంబసభ్యులు మరియు వైద్య బృందం అప్రమత్తంగా పర్యవేక్షిస్తున్నాయి. రాజకీయ వర్గాల్లోనూ ముద్రగడ ఆరోగ్యంపై ఆందోళన వ్యక్తమవుతోంది.