ఇది థ్రిల్లింగ్ ఛాలెంజ్: శ్రేయస్ అయ్యర్

అంతర్జాతీయ క్రికెట్లో ఒక కొత్త అధ్యాయానికి టీమిండియా శ్రీకారం చుట్టనుంది. చరిత్రలో తొలిసారిగా జపాన్తో అంతర్జాతీయ టీ20 మ్యాచ్ ఆడేందుకు భారత జట్టు సిద్ధమైంది. అయితే, ఈ రోజు సానో ఇంటర్నేషనల్ క్రికెట్ స్టేడియంలో జరగాల్సిన భారత జట్టు ప్రాక్టీస్ సెషన్ భారీ వర్షం కారణంగా రద్దయింది. అయినప్పటికీ, కెప్టెన్ శ్రేయస్ అయ్యర్ మాత్రం పూర్తి ఉత్సాహంతో ఉన్నాడు. తెలియని ప్రత్యర్థితో వారి గడ్డపై ఆడటం ఒక థ్రిల్లింగ్ ఛాలెంజ్' అని అతను అభివర్ణించాడు. అంతకుముందు జరిగిన ప్రెస్ కాన్ఫరెన్స్లో శ్రేయస్ అయ్యర్ మాట్లాడుతూ.. "తొలిసారిగా జపాన్తో ఆడుతున్నాం. ఇది మాకు ఎంతో థ్రిల్లింగ్గా, ఉత్సాహంగా ఉంది. ఇక్కడి పరిస్థితులు, వికెట్ గురించి మాకు పెద్దగా అవగాహన లేదు. అయినా ఒక మంచి మ్యాచ్ ఆదాలని ఎదురుచూస్తున్నాం' అని తెలిపాడు. 

వీడియో క్లిప్పులతో ప్రత్యర్థిపై అధ్యయనం

జపాన్ జట్టుతో ఇంతకుముందెన్నడూ తలపడనందున, వారి ఆటగాళ్ల బలాబలాలను అంచనా వేయడానికి భారత టీమ్ మేనేజ్మెంట్ టెక్నాలజీని ఆశ్రయిస్తోంది. ప్రత్యర్థి ఆటగాళ్లకు సంబంధించిన వీడియో ఫుటేజ్, డిజిటల్ క్లిప్పులను నిశితంగా పరిశీలిస్తోంది. "నేను వారికి సంబంధించిన కొన్ని రీల్స్ చూశాను. మేము వారి ఆటగాళ్ల గురించి వూర్తి స్థాయిలో అధ్యయనం చేసి బరిలోకి దిగుతాం. రేపటి మ్యాచ్కు వర్షం అడ్డుపడదని, అభిమానులందరూ ఒక మంచి పోటీని చూస్తారని ఆశిస్తున్నా" అని అయ్యర్ పేర్కొన్నాడు.

జపాన్ సంస్కృతి, ఆతిథ్యానికి ఫిదా

పాతతరం క్రికెట్ దేశాలకు భిన్నంగా జపాన్లో పర్యటించడం ఒక కొత్త అనుభూతినిస్తోందని అయ్యర్ చెప్పాడు. "ఆస్ట్రేలియా, ఇంగ్లండ్, న్యూజిలాండ్ వంటి పర్యటనలకు ఇది పూర్తిగా భిన్నమైనది. జపాన్ రావడం ఇదే తొలిసారి. ఇక్కడి ప్రజలు, సంస్కృతి, క్రమశిక్షణ అన్నీ కొత్తగా ఉన్నాయి. కొత్త సంస్కృతులను ఇష్టపడే నాకు ఇది బాగా నచ్చింది. భారత్, జపాన్ మధ్య స్నేహబంధం బలపడుతోంది. నాకు 'అరిగాటో', 'కొనిచివా' అనే రెండు జపనీస్ పదాలు తెలుసు" అంటూ నవ్వేశాడు. జపాన్లో అడుగుపెట్టినప్పటి నుంచి ప్రజలు ఎంతో ఆప్యాయంగా, సహాయం చేసే గుణంతో ఉన్నారని, వారి ఆతిథ్యం అద్భుతంగా ఉందని ప్రశంసించాడు.